حرت فالعنوان
قريت وقريت والباك شديت ... الاجازة عليها حصلت من ديك الساعة وانا حاصلة بلا خدمة ... السطاجات دوز هنا ولهيه فمختلف المجالات ... بالمجان.... للصعنة جربت ... هادي هي سبع صنايع والرزق ضايع ... جاني رزق الزواج وعليه قبلت ... علاش لا وهو موظف وفأشرف مهنة خدام ... معه مشيت واستقريت ...فالجبل سكن وضيفي فالمدرسة بوحدها فوق الكدية ... بعيدة على السكان ... هادي تكنة عسكرية ولا مدرسة القرب ... للبيدو هزيت والما سكيت ... بالشمع ضويت معضم ليالي باردة وساكنة ... بوحدو صوت ريح الشركي البارد يكسر صمت المكان ونباح كلاب تئن من الجوع والبرد ... صبرت مع راجلي وليت نعاونو ... عرفت الجدادات والمذكرة و المناهج التربوية ... والفرق بين الجيد والمفيد نفس المحتوى بأغلفة مختلفة ... للكفاءة وجدت نقرا ونلخص عن الهدر المدرسي الاسباب والحلول ...للنتيجة تسنيت ...على التبادل قلبت فالنت والانتقال كنساين ... عسى ربي يحن علينا ويسهل علينا بشي انتقال للمدينة ... ولكن هيهات اللا عبوش فينك وفين المدينة ... والدولة تصدق علي بثلاثين درهم فالشهر كتعويض وجزاء على العطالة وصبري فالجبل ربي ئلا ماقولو ليا اش نعمل بيها من كثرتها حرت اش نعمل بيها ... هدا تعويض كيستفزني وكيهين كرامتي و كلمة" بدون" درتو ليا فالمهنة واش اللي مقابل دارو نسميوه "بدون" ... مصطلح كيبين مدى تخلف الادارة المغربية ...
ئوا سميوني عبوش ولا عيوش هدا اقتراحي لاصلاح التعليم ... للاستاذ رجعو ليه كرامتو اللي دسيتوها فالتراب ... السكنيات بنيو حدا المدارس فالمناطق الجبلية ... عدد التلاميد قللو فالقسم ماشي ربعين ولا خمسين ... والمناهج خففو داكشي يكون خفيف ضريف ضغيا يدخل للعقل...وللراتب شوية زيدو راه بالزز باش تنكملو الشهر .
